Escribí ya va bien d'años un articulín sobro la evolución histórica del topónimu "Ástura", que resultóu en "Esla". Sicasí, güei quería falar de l'acentuación de los sous derivaos "ástur" y ´"astures"
Está xeneralizao l'usu de “astur” y “astures”, onque nun ye correcto, ya que al traviés del estudiu del latín sabemos que la “U” de ASTŬRA y ASTŬRES yera una vocal breve, polo que la vocal tónica –aquella na que recae l'acento– tenía que ser necesariamente la precedente (en latín la tonicidá depende mecánicamente de la cantidad de la sílaba). Ye la chamada "llei de la penúltima", porque si la penúltima sílaba yera llarga, l'acentu cayía enriba d'ella; si yera breve, cayía na antepenúltima. Cumo la sílaba -TU- yera breve, polo tanto l'acentu cayía en AS-. Amás, hai un pasaxe en versu de Siliu (I, 231), onde atopamos "Astur avarus" no que, atendiendo al esquema métricu del hexámetru dactílicu rescampla que la -u- de ASTVR ye breve. Y n'outra obra el mesmo Siliu puede lliese: "Asturica rapidos de gente iugales", y n'un versu de Lucanu "Asturii scrutator pallidos auri", lo que demuestra que la u yera breve también ehí.
Onque hai algún usu de la palabra nas crónicas de Alfonsu III, polo xeneral "ástur" y "ástures" dexonon d'usase na Edá Media. Cuando fonon recuperadas muito más tarde polos eruditos, pesóu l'acentuación de la mui usada palabra "Asturias", que lleva la tónica en -tu-, de forma correcta, porque la penúltima sílaba en latín, -RI-, yera breve. Y d'ahí el usu xeneralizao de "astur" y "astures" en llugar de ástur y ástures.
FUENTE: MORALEJO ÁLVAREZ, José Luis, "Ni "Astur" ni "Astures",sino "Ástur" y "Ástures", EN "Boletín del Instituto de Estudios Asturianos", Año nº 31, Nº 90-91, 1977, págs. 363-372.
Entradas
0 comentarios:
Publicar un comentario