Esti sábadu 22 foi el VIII Ancontro "Blogueiros de l Praino", na localidá de La Speciosa ("Especiosa" en Portugués). Ye'l cuartu añu que voi, atraídu cumo siempres pola buena compañía de las buenas xentes mirandesas, y pola perspectiva de volver a cumer puosta. Nesta edición yeran los maordomos el nuesu amigu Tiégui Albes, Tresa Almeida, y, sobre todo, Adelaide Monteiro, natural de La Speciosa, y que foi quien fizo de guía pol puebru. Cumo yera de llei, tódalas cousas se faloron en mirandés, la variante del asturllionés del Praino ou Tierra de Miranda. Sacante la mia intervención, que foi en llionés meridional.
L'Ancontro emprincipióu a las 10 (hora local), dando una vueltiquina polas "rugas" (caleyas) y fuentes del puebru. Axuntóronse xentes de tódolos llugares de L Praino, amás de Zamora y Llión.
 |
| Típica casa speciosana, cona "cortina" pa los gochos abaixo a la dereita. |
 |
| No poyu de la casa, una llábana o llousa con buraquines, cumo la que viéramos en Sandin / Sendim. |
Despuéis tiramos pa la Igresia, onde Dinis Meirinhos, fiyu del mieu amigu Alcides, diounos un prestosísimu y emotivu conciertu de guitarra. Esti mozu ye un virtuosu, y de seguru que dará mueito de qué falar no futuru.
Y despuéis vuelta a caleyar, visitando la cruz...
...y el famosu "Citote", qu'unos dicen que ye un símbolu fálicu, y outros que ye un verracu a medio facer, o desgastáu pol pasu del tiempu:
Adelaide diba llendo poemas en cada parada: nun yera pa menos, porque ye mui buena poetisa. Vai pouco publicóu el llibru "Bózios, Retombos i Siléncios", que merquéi nel Ancontro. Amás, ganóu el segundu premiu del Certame Lliterariu Astúrica 2014.
 |
| "La Fuonte de l Cereijal" (de la Zreisal) |
 |
| Na casa había dagunas fotos dedicadas de los astronautas del Apolo XV. |
Y chegóu el gran momentu: l'almuorço ou xanta al pía de la igresia del Naso, con deliciosas tabafeyas ("alheiras" en portugués) y "puosta" pa fartar, feito todo "ne l lhume" (al borrayu) eillí mesmo.
 |
| Fomos casi cuarenta pa xantare... |
 |
| Tamién falóu Artur Nunes, presidente de la Câmara Municipal de Miranda do Douro. |
Despuéis tocóume falar na Casa de l Naso, en nome de la Asociación Faceira, sobro la historia de los pendones, nuna ponencia titulada "Pendones de la ñuesa tierra: un repasu pola sua historia", na que faléi de la posible conexión medieval de los pendones mirandeses y llioneses, onque marcando las distancias, porque l'orixe más directu de los pendones de güei está nos relixosos del siegru XVI. Faléi cuasi cincuenta minutos, pámeque demasiao...
 |
Deseguida falóu Alcides Meirinhos, sobre'l Carril ou caminu Mourisco con una ponencia chamada "Carril Mourisco i cruzes deiqui". Foi bien interesante, y amás resultóu que Pedro Gómez Turiel, de l'asociación zamorana Furmientu, está investigando esi mesmu carril no llau alistanu.
Y pa rematar, visita a la Igresia de L Naso, con Adelaide. Cuntóu la historia d'un cristianu y un mouru que foron "teletresportaos" milagrosamente de tierras mouras a L Naso nuna arca. Esta mesma historia existe en Llión, na Virxen del Caminu, nada menos...
 |
| El mouru. |
Nun pudi quedar más tiempu, pa respectar los horarios de Martín, pero dalgunos allargoron el Ancontro en casa d'Adelaide. Foi un día perfectu, no que solo nos faltóu la presencia d'Amadeu, a quien siempres llevaremos no corazón...
Entradas
0 comentarios:
Publicar un comentario